News Live Scores
Young Africans

Breaking: Pluijm aondoka Yanga

6:43 PM GMT+4 03/03/2017
Simba vs Yanga
Uongozi wa Yanga umesitisha mkataba na aliyekuwa kocha wao Hans van der Pluijm

Uongozi wa Yanga umesitisha mkataba na aliyekuwa kocha wao Hans van der Pluijm ambaye kwa sasa alikuwa mkurugenzi wa ufundi baada ya ujio wa kocha Goerge Lwandamina raia wa Zambia.

Katibu Mkuu wa Yanga Boniface Mkwasa, ameiambia Goal, sababu za kukatisha mkataba na mkurugenzi wa ufundi ni ukata wa pesa ulioikumba klabu hiyo baada ya Mwenyekiti wake Yusuph Manji, kupata msukosuko na Serikali.

“Uongozi wa juu umeamua kusitisha kibarua cha Mkurugenzi wetu wa ufundi, kutokana na ukata wa fedha ambao unatukabili hivisasa, ni kitu ambacho kinaumiza kutokana na mchango wa Pluijm kwenye kikosi chetu lakini hatuna namna,”amesema Mkwasa.

Mkwasa amesema taarifa za kusitisha mkataba wa Pluijm amezipokea kutoka kwa uongozi wa juu na yeye kama mtendaji mkuu wa timu amemwita mkuu huyo wa benchi la ufundi na kufanya kile alichoagizwa.

Amesema kama timu inathamini mchango wa kocha huyo kwa kipindi chote ambacho ameifundisha timu yao na mafanikio ambayo amewapa ikiwemo kucheza hatua ya makundi ya Kombe la Shirikisho Afrika wanamtakia safari njema na mafanikio memo katika kazi mpya.

Pluijm ameifundisha Yanga kwa vipindi viwili tofauti na kuipa mafanikio makubwa timu hiyo ikiwepo kubeba mataji mawili ya ligi ya Vodacom, Ngao za hisani mara mbili na Kombe la FA mara moja huku timu hiyo ikivunja rekodi yake iliyoiweka mwaka 1998 kwa kufuzu hatua ya makundi ya michuano ya Kombe la Shirikisho Africa CAF.